Plasentia de Butron museoak 25 urte daramatza Plentziak eta Uribe Kosta eskualdeak itsasoagaz duten harremana kontatzen. Urteurrena ospatzeko, Plentziako Udalak merkantzien antzinako itsasoko garraioa simulatzen duten egurrezko hainbat kaxoi instalatu ditu udalerriko hainbat lekutan, eta, horien bidez, hiribilduagaz eta museoagaz erlazionatutako hainbat istorio ezagutu ahal izango dira, pasadizo moduan.
Aire zabaleko erakusketa hori 2023 osoan egongo da ikusgai plentziar eta bisitarientzat, eta, datozen asteetan, museoaren 25 urteetako aldi baterako erakusketa garrantzitsuenak jasotzen dituzten zazpi panel jarriko dituzte Ontziolako kioskoan.
Plentziako alkatea den Elixabete Urribarrik adierazi duenez, egitasmo horren helburu nagusia da "museoko bizitza Plentziako kaleetara, bertako bizilagunengana eta bisitariengana hurbiltzea". Horrez gain, datozen egunetarako herritarrei zuzendutako jarduera-programa prestatzen ari dira, hurrengo asteetan aurkeztuko dutena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
