Plentziako Udalak gutun bat bidali dio Correosi udako posta-zerbitzuaren murrizketaz kexatzeko

Ander Zarraga 2023ko ira. 12a, 16:42
2020ko udan, Plentziako Correoseko bulegoan jarritako kartela, non adierazten da bulegoa itxita egongo dela. © IZASKUN ORMATXEA

Uda honetan, jasotako "kexa-kopuru handia dela eta", Plentziako Udalak gutun bat bidali dio zuzenean Juan Manuel Serrano Quintana Correos y Telegrafos Estatuko Sozietateko presidenteari.

Gutunaren lehen lerroetan adierazi diotenez, "azken udetan posta-zerbitzuaren murrizketarekin gertatzen ari den arazoaren berri emateko eta etorkizunean egoera hori zuzentzeko beharrezko neurriak har ditzazuen eskatzeko", idatzi dute hori. 

Bertan azaldu dutenez, uztailaren 24tik irailaren 1era "udako ordutegia" ezarri arren, Plentziako bulegoan erabat itxita egon da, eta informazio-kartelean bezeroak Gorlizko bulegora bidaltzen zituzten. "Ez da benetan udako ordutegi murrizturik ezartzen, gure udalerrian posta-zerbitzua zuzenean eteten da", deitoratu dute gutunean.

Horren ondorioz herritarrei eragiten zaizkien eragozpenen artean, Udaleko arduradunek joan-etorriak, udaldia izanik ematen diren aparkatzeko arazoak eta "30 minutuko" ilarak gaitzetsi dituzte, besteak beste. Gaineratu dutenez, "Plentzian 4.400 bizilagun daude erroldatuta, eta biztanleria hirukoiztu egin da udan. Gorlizen antzeko hazkundea gertatzen da".

Hori horrela, eta kontutan hartuta Gorlizko bulegoak betiko langile kopuruagaz jarraitzen duela, eta bi udalerrietako bizilagunei eta udako biztanleriari zerbitzua gehigarria eman behar zaiela, neurriak hartzeko eskatu diote Serrano jaunari.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun