Arkotekoek adierazi dutenez, Laraudogoitiak beti defendatu ditu taldeko koloreak, "garai kaskar zein oparoetan". Taldea sortzeko inplikatu zenetik, beti mantendu izan du harreman oso estua klubagaz, "eta urteek aurrera egin ahala gertutasun eta interes handia izaten jarraitu du". Gogoan izan dutenez, beti laguntzeko prest, estropadetarako bere ontzia ere eskaintzen zuen, eta 2019an Arkoteko historia atala idazten hasi zen taldearen webgunean, "hark beste inork baino hobeto ezagutzen zituelako elkarte honen sorreraren nondik norakoak".
Arkotekoek azpimarratu dutenez, "Txetxu arkotezale porrokatua zen" eta "estropadak arreta eta zirrara handiz" jarraitzen zituen. Hori dela eta, 2022an Bilbon jokatutako KAE1 ligako azken estropadan, arraunlariek Bilboko Uriko 44. Bandera eskuratu zuten eta Laraudogoitiari eskaini zioten, "Arkoteko sortzaile, presidente ohi eta zale amorratuari".