Plentzia, Gorliz eta Barrikako kostaldea BizkaiaGara Eguna ekimenaren parte izango da datorren domekan. Egun horretan, dozenaka boluntariok bat egingo dute itsas hondoa eta hondartzak kutsatzen dituzten hondakinak kentzeko, kostaldearen jasangarritasuna eta ingurumen-osasuna hobetzeko ahaleginean. Bizkaiko Foru Aldundiak babestutako ekimenak urpekariak eta ekintza-taldeak izango ditu, itsaslabarretatik itsasadarreraino.
Urpeko garbiketa Mare Fondumek egingo du, zeregin horietan espezializatutako erakundeak, eta esperientzia duten urpekarientzat gordeko dute. Bitartean, beste boluntario batzuk Plentzia eta Gorliz arteko pasealekuan ibiliko dira zigarrokinak biltzen, ingurumenerako hondakin ohikoenetako eta kaltegarrienetako bat baitira. Ola Sin Plásticos, GoazenUp, Tantak Sare Berdeak eta Nakusarbe bezalako elkarteek gidatuko dituzte kaleko ekintzak, Plentziako Ontziola plazan egingo dituzten hezkuntza eta sentsibilizazio jarduerakaz batera.
Jardunaldian zehar, Plentziako Itsas Estazioak ,tsas ekosistemetara hurbilketa zientifikoa ere eskainiko dute, baita erakusketa interaktiboak eta itsas espezieak behatzeko laborategi mugikor bat ere. Garbiketa jardueren ondoren, herri-bazkaria egingo dute parte-hartzaileen artean espiritu komunitarioa indartzeko. Inplikatutako erakundeek aurreko urteetako zifrak gainditzea espero dute; izan ere, aurreko edizioan, tona bat zabor baino gehiago erretiratu zuten inguruko kostaldetik eta itsas hondoetatik.
Egitasmoaren informazio guztia eta izen-emateak lotura honen bitartez kontsultaltu daitezke.
🕣 Gero eta gutxiago geratzen da BizkaiaGara Egunerako!
— BizkaiaGara (@bizkaiagara) September 17, 2024
Hurbildu zaitez Plentzia, Gorliz eta Barrikako kostaldera egun desberdin bat pasatzera eta lagundu plastiko kutsadurarik gabeko planeta baterantz aurrera egiten!
📍 Plentzia
📆 Irailaren 22an pic.twitter.com/KGvNaHK78z