Plentziako Udalak ofizialki eskatu du BI-2704 errepidearen zati bat, zehazki 21. eta 24. kilometroen artean dagoena, "puntu beltz" gisa kalifikatzea, ezbehar-tasa handia duelako. Trafiko Zuzendaritzak 2024ko abuztuan eguneratutako txosten baten arabera, segmentu horretan 75 trafiko-istripu gertatu dira hamar urteotan, 58 zauritugaz; horietatik bostek zauri larriak izan dituzte.
Aitor Garagarza Plentziako alkateak egindako eskarian azpimarratu du egoerak kezka handia sortzen duela plentziarren artean, "errepide horren mende baitaude eguneroko joan-etorrietarako".
Halaber, udalburuak bide horren garrantzia azpimarratu du, izan ere, Plentzia Urdulizko Ospitalearekin lotzen du, "eta funtsezko ibilbidea dela zerbitzu medikoetara eta larrialdi-zerbitzuetara heltzeko". Isuskitza auzorako eta Ardantzako kirol instalazioetarako lotura bakarra dela ere gaineratu du, "auzo periferikoko mila bat biztanle bide horren mende daude", erantsiz.
Bere eskaeran, Udalak gogorarazi du Eusko Jaurlaritzaren Euskadiko Bide Segurtasuneko 2025 Plan Estrategikoak eta Bide Segurtasuneko Urteko Txostenak ezbehar-tasa handia duten tarteetan lehentasunez esku hartzeko beharra nabarmentzen dutela. Horrenbestez, tarte hori "puntu beltz" izendatzeak aukera emango luke istripu-arriskua murrizteko eta bide-segurtasuna hobetzeko segurtasun-neurriak ezartzeari lehentasuna emateko, errepide horretako biztanleen eta erabiltzaileen mesedetan.