Plentziak Portuko Udal Kontseilua eratu dute, eta EAEko bosgarren udalerria da kide anitzeko organo hori osatzen, Mutriku, Ondarroa, Getaria eta Elantxobegaz batera. Aholkularitza-, kontsulta- eta eztabaida-gune hori Eusko Jaurlaritzak irailean onartutako dekretuaren barruan sartzen da, eta ezartzen du kontseilu horiek sortzea partaidetzazko kudeaketa baten zati gisa eta kostaldeko udalerrietara egokituta.
Sorreran zehar, Plentziako Udalaren, Portu eta Itsas Gaietako Zuzendaritzaren eta EKPren (Euskadiko Kirol Portuak) ordezkariek lehentasunezko gaiak jorratu zituzten, hala nola itsasadarraren antolamendua, portu-azpiegituren garbiketa eta mantentzea. Koldobika Goitiak, Eusko Jaurlaritzako Portuen zuzendariak, kontseilu horiek "portuen kudeaketa eraginkorragoa eta tokiko beharrekin lerrokatuagoa" ahalbidetuko dutela nabarmendu zuen.
Eusko Jaurlaritzako Portu eta Itsasa Gaietarako Zuzendaritzako eta EKPko ordezkariak Plentziako Udaleko ordezkariakaz izan zuten bileraren irudia. © IREKIA
Bileran Plentziako alkate Aitor Garagarza eta Eusko Jaurlaritzaren ordezkari Edurne Egaña ere izan ziren. Horretan hartutako erabakiak lotesleak izango ez diren arren, foro honek portuari lotutako administrazioen eta gizarte-eragileen arteko elkarrizketa sustatu gura du, portuko jarduerak udalerriaren bizitzan duen integrazio sozial, kultural eta ekonomikoa indartuz.
Portuko Udal Kontseiluak sortzeko prozesuak datozen hilabeteetan jarraituko du, Armintzan, Ean, Hondarribian, Donostian, Orion, Zumaian, Deban, Lekeition, Mundakan eta Bermeon aurreikusitako bilerakaz. Guztiak 2025eko lehen hiruhilekorako eratuta egotea espero dute, Euskadiko portuen kudeaketan parte hartzeko sare hori sendotuz.