Emakume pilotarien maila eta ikusgarritasuna zabaltzeko bidean, ezinbesteko zita bihurtu da Udako Master Laboral Kutxa Torneoa. Aurtengo edizioa domeka honetan hasiko da Plentziako Jai Alai frontoian eta irailaren 28an bukatuko da Bermeoko Artza pilotalekuan; tartean, 25 udalerri bisitatuko dituzte. Multzo bitan banatutako zortzi bikotek parte hartuko dute goi mailako binakako lehiaketa honetan: A taldean Aldai-Bergara, Arrizabalaga-Zabala, Ibarrola-Mendizabal eta Zabaleta-Oses arituko dira eta Etxegarai-Bertiz, Lide Lopez-Erasun, Uriarte-Gaminde eta Arraiza-Capellanek osatuko dute B multzoa. Finalerdiak irailaren 19an jokatuko dira Oñatiko Zubikoa pilotalekuan.
Txapelketak emakume pilotarien egutegi trinkoa osatzeaz gain, harrobiko gazteentzako aukera paregabea eskainiko du lehen mailako kirolarien jarduna gertutik ezagutzeko. Finala, gainera, zuzenean eskainiko dute ETB1, ETB.eus eta ETB Sat kateek, lehiaketaren ikusgarritasuna bermatzeko.
Laboral Kutxako ordezkari Alvaro Parroren hitzetan, “oso txapelketa lehiatua eta orekatua izango da, eta udalerri askotan jokatzeak txapelketari xarma berezia ematen dio”. Txapelketa honek, beraz, kirola eta herriz herriko partaidetza uztartuko ditu uda osoan zehar.