Espedienteak urteetako ibilbidea izan du, Udalak 2019an frontoiko instalazioak eta inguruko eremu batzuk erregularizatzeko aukera aztertzea eskatu zuenetik. Ondoren, proposamena zabaldu zuen, Errotabarriko futbol-zelaiko lurzorua ere itsas-lehorreko jabari publikotik ateratzeko asmoagaz. Trukean, Udalak Txipioko errugbi-zelaiaren inguruko lurrak erosi eta Itsasertz Mugarteari lagatzeko konpromisoa hartu zuen.
Ministerioaren arabera, frontoiaren kasuan egoera desberdina da. Ebazpenean jasotzen denez, itsas-lehorreko jabari publikoaren barruan dagoen 244,7 metro koadroko eremuak bere jatorrizko ezaugarri naturalak galdu ditu eta gaur egun eraikinaren parte da; horrenbestez, administrazioak ondorioztatu du eremu hori jada ez dela beharrezkoa kostaldearen babeserako edo erabilerarako. Beraz, azalera hori desafektatzeko izapideak hasteko eskatu dio Ogasun Ministerioari.
Errotabarriko futbol-zelaiaren kasuan, ordea, erabakia kontrakoa izan da. Ministerioaren ustez, 11.914 metro koadroko eremua itsasadarraren ondoan dago eta oraindino berreskuratzeko moduko ezaugarri naturalak ditu. Gainera, ebazpenak azpimarratzen du klima-aldaketaren ondorioz itsas-mailaren igoera aurreikusten dela eta, horregatik, eremu hori etorkizunean babes publikoko lur gisa mantentzea beharrezkoa dela.
Bestalde, Itsasertz Mugarteak gogorarazi du Errotabarriko instalazioak behin-behineko izaeragaz baimendu zituztela, helburua etorkizunean beste kokaleku batera lekualdatzea zelako. Horren harira, administrazioak adierazi du ez duela onartzen futbol-zelaiaren desafektazioa Txipioko lurren lagapenagaz baldintzatzea, baina prest azaldu da azken horiek etorkizunean jabari publikora gehitzeko, Udalak erosiko balitu.