"El Abanico" izenez ere ezaguna den urbanizazioan 1.000 bizilagun baino gehiago bizi dira, eta sarbideen egoerak urte luzez eragin ditu desadostasunak bizilagunen eta Plentziako Udalaren artean. "Dos Palmeras"en titulartasuna argitzeko, Udalak ingenieritza-enpresa bati ikerketa eskatu zion, eta ia 900 orrialdeko txostena osatu zuen. Horren arabera, bidea 1970eko hamarkadan eraiki zuten urbanizazioari lotuta, eta etxebizitzen sustatzaileak hura mantentzeko konpromisoa hartu zuen.
Bizilagunek, aldiz, "Dos Palmeras" ez dela inoiz Isuskizaren parte izan defendatu dute. Horren erakusgarri, Udalak azken urteetan bidean egindako bi konponketa aurkeztu zituzten, 20.000 eurotik gorakoak. Epaileek, ordea, esku-hartze horiek ez direla nahikoa bidea udal-jabetzakoa dela frogatzeko argudiatu dute. Era berean, 1970eko hamarkada baino lehen bidea existitzen zela erakusten duen argazki, plano edo bestelako dokumenturik ez dagoela ondorioztatu dute.
Bi sarbide, bi ebazpen ezberdin
Egoera bestelakoa da Isukiza Plentziako hirigunegaz eta Mungiarako norabideagaz lotzen duen beste sarbidean. Bide hori 2016an itxi zuten ibilgailuentzat, segurtasun-arazoengatik eta zuelo handien ondorioz. Auzi horretan, epaitegiek bizilagunen alde egin zuten, Udala bidea konpontzera behartuz.
Konponketa horrek aurrera jarraitzen du gaur egun. Isuskizako komunitateak argitaratutako informazioaren arabera, bidea osorik asfaltatu beharko da, eta proiektuak lurzoruaren eta ezpondaren egonkortasuna bermatzeko azterketa geoteknikoak jaso beharko ditu.
"Dos Palmeras"en kasuan, ordea, azken ebazpenak bizilagunen gain utzi du mantentzea. Urteotan, Isuskizako bizilagunek behin baino gehiagotan ohartarazi dute sarbide horien konponketak milioika euroko kostua izan dezaketela eta ezin dutela gastu hori euren gain hartu.