Musika klasikoa entzuteko ez da kontzertu-areto handi batera joan beharrik izango datorren aste-akabuan. Azaroaren 13an, 14an eta 15ean, Plentziak hainbat musika-proposamen hartuko ditu, adin guztietako herritarrek doinuez gozatzeko aukera izan dezaten.
Arrastietan, eliza izango da jaialdiaren agertoki nagusia. Barikuan, azaroaren 13an, organoaren eta oboearen doinuak entzuteko aukera izango da. Zapatuan, berriz, hari-laukote baten txanda izango da, eta domekan, azaroaren 15ean, haize-metalezko boskote batek emango dio amaiera kontzertuen egitarauari.
Baina jaialdia ez da helduentzat bakarrik izango. Etxeko txikienek ere musikagaz gozatzeko aukera izango dute, zapatu eta domeka goizetan antolatutako ipuin saio musikatuen bidez. Kontakizunak eta musika uztartuko dituzten emanaldiak Eugenio Campillo parkean egingo dituzte, aire zabalean. Eguraldiak laguntzen ez badu, ordea, Goñi Portalera lekualdatuko dituzte.