Modu horretan, SHK-k sistema ezberdinak konparatzeko aukera izango du, eta Udalak, kontseiluaren aholkuan oinarrituz, sistemarik eraginkorrena aukeratuko du. Udalarentzat, gaur egungo sistema aldatzea ezinbestekoa da: “Gaur egungo sistemagaz ez dugu lortuko 2050. urtean hondakinen %50 birziklatzea, eta hori da Europar Batasunak jarri duen muga”.
Gaur egun, Sopelak edukiontzietan oinarritutako bilketa-sistema du. Udalbatzaren gehiengoak 2012ko uztailean bosgarren edukiontzia urtebetez ezartzea onartu zuen, “proiektu pilotu” moduan. Bada, Udalak iazko azaroan jakinarazi zuen legez, bosgarren edukiontziak ez du lortu herriko birziklatze-tasa handitzea: 2012an sopeloztarrek %16,48 birziklatu zuten, eta 2013an, berriz, %16,85. Hau da, organikoaren edukiontziak %0,37 igo du Sopelako birziklatze-tasa.
Bestalde, Udalak jakinarazi duen legez, azken hilabeteetan edukiontzi marroian jasotako hondakinak ez dira konposterako baliogarriak izan, edukiontziaren erabilera okerra dela eta: “Botilak, plastikoak, erlojuak, alfonbrak... denetarik agertu da”. Horren ondorioz, Artigasen ez dituzte hondakin horiek onartu, eta Zabalgarbin erre dituzte, errefusagaz batera.