Sopelako Udaltzaingoak hiru pertsona atxilotu ditu gaur, eguena, etxebizitza batera lapurtzera sartuko zirelakoan. Udal iturriek adierazi dutenez, auzokide batek eman du abisua, pertsona biren jarrera susmagarria iruditu zaiolako. Atariaren inguruan egon dira. Udaltzaingoa bertaratu da eta atxilotuetako bat atalondoaren barruan topatu du, eta beste bi lagunak kotxe baten barruan. Etxebizitzetako ateak zabaltzeko material ugari bahitu diete, polizia iturrien arabera.
Atxilotuak Getxoko ertzain etxera eraman dituzte, izapideak egitera. Beste etxebizitza batzuen lapurretagaz lotura omen duten argitu gura dute. Bertoko Poliziak honako aholkua luzatu die auzokideei: etxebizitzen inguruan ezagunak ez diren pertsonak dabiltzanean, Sopelako Udaltzaingoari (944 065 511), Getxoko Ertzaintzari (944 063 420) edo SOS Deiak zerbitzuari (112) jakinarazteko, dagozkien egiaztapenak egin ditzaten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!