Apirilaren 25ean egingo da Sopelako Esaera Zaharren XXII. Txapelketa. Urtero legez, Sopelako AEK-k egun osoko egitaraua prestatu du, aurten "Pezeteagatik, durorik ez!" goiburupean. Ordura arte zerrendako ehun esaera zaharrak ikasteko denbora edukiko dute lehiaketan izena eman duten 18 taldeetako kideek. Izan ere, txapelketaren gakoa honakoa da: bertsolariek hainbat bertso botako dituzte, eta taldeek asmatu beharko dute zein esaera zaharrari dagokion bertso bakoitza. Ez dago esaerak edozein modutara esaterik, bakoitza zerrenda ofizialean agertzen den modu berean (berbaz berba eta hizkiz hizki) adierazi beharra dago.
Txapelketak saio bi ditu: 12:00ak aldera hasiko dira kanporaketak, taldeak sei ibilbidetan banatuz herrian. Ibilbideak eginda, denak Ander Deuna ikastolara igoko dira 15:00etan, bazkaltzeko. Horren ostean, jokatuko dira finalerdia eta finala, 17:00etatik aurrera.
Bazkarira joan barik ere aukera dago aipatutako azken saio horiek ikusteko. Hala ere, antolatzaileek aipatu dutenez, egun berean ere izaten da bazkarian izena emateko (20 euro) aukera, janari gehiago antolatu ohi dutelako badaezpada. Arrastian, Nerea Ibarzabal eta Aitor Sarriegi izango dira bertsolari gonbidatuak.
Sariak
Esaera Zaharren Txapelketako antolatzaileek adierazi dutenez, goizeko ibilbide bakoitzeko txapeldunek saria dute seguru: afaria jatetxe batean. Arrastiko saioa ere irabazten duenak, ostera, Areatzako hotel-bainuetxean lau pertsonentzako asteburu-pasa jasoko du. Horiez gainera, beste hiru sari daude. Irabazlea nor izango den asmatzen duenari pertsona birentzako afaria emango diote. Bestalde, zozketako sariari dagokionez, hasieran parte-hartzaileei ematen dieten oroigarrien artean bada berezia den bat, hori duenak afaria pizzerian eta supermerkatuko bonua jasoko ditu. Esan legez, txapelketan ehun esaera zahar erabiltzen dituzte, baina horietako bat berria da. Afaria dago esaera faltsua zein den asmatzen duenarentzat.
Esaeren zerrenda
1. ABADE ARGALAK GITXI DAZ
2. ABERATS PLANTAN DABILENA, LASTER POBRE AGERTUKO DA
3. ABERATSAK, GUZTIAK ADISKIDE
4. ADISKIDEAK, ZAINDU BEHARREKOAK
5. AGURE ONARI EZ ATEAK ITXI
6. ALFERRAK KAKA SARRI, URRUTIRA JOAN ETA NEKEZ ETORRI
7. APIRIL ONA EZAGUTZEKO, EHUN URTE BIZI BEHARKO
8. ARRAZOI EZ DUENAK, OIHUA HANDI
9. ASKOREN MINA, TONTOEN ATSEGINA
10. ASTO BATEK BAINO BIK GEHIAGO DAKIE
11. BELEARI ERE EDER ZAIO BERE AHOTSA
12. BETI BEHARREN TA KAKA MORRALEN
13. BIHAR ERE ARGITUKO DIK/N
14. BURUA SALDU ETA TXAPELA EROSI
15. DAKIENAK HARTZEN, DAKIKE EMATEN
16. DANOK LARRU GORRI JAIOTZEN
17. DUPA NOLAKO, ARNOA HALAKO
18. EDADE BATERA EZKERO, DISGUSTO GUTXI, LANA NEURRIZ ETA MOKADU GOXO-GOXOA SARRI-SARRI
19. EDER EDO ITSUSI, ZEIN BEGIK IKUSI
20. EROGOA DA ITO-NAHIARI HEDATZEA ESKUA
21. ERORIENA IZANIK ERE, ALTXA DITEKE
22. ERRETZ TXARRAZ, BAZTERRAK NARRATS
23. ERROMARA ZOHIENAK, LEKUA GAL
24. ESKALIARI EMATIA, JANGOIKUARI EMATIA
25. EUSKARAZ JAKIN, EGITEN DUENAK DAKI
26. EZ DAGO EGUZKIAK ERRETAKO OGIRIK
27. EZKONGAIETAN GOXO, EZKONDU TA OTSO
28. GAITZ GOGORRENAK ERE BADU BERE AZKENA
29. GALDEA BERO, ESKERRA HOTZ
30. GAUAK EZ DU DEUS ONIK
31. GURASOAK BETIRAKO EZ DIRA
32. HANDIAK, TXIKIA AHANTZARAZTEN
33. HATZA EMON ETA BESUA HARTU
34. HIL HADI, GORATUKO HAUTE
35. HOBE JATEN GASTAU, BOTIKETAN BAINO
36. HOBEKI DA SOBERA, GUTIEGI BAINO
37. HURREKO SUTEAN LAGUNDU EZIK, ETXEA GAL
38. IDIA EZ DA BAKARRIK UZTARTZEN
39. IGAROA, IGARO
40. IGELA HASERRETURIK ERE, URMAELARI EZ ZAIO AXOLA
41. IKASIRIK EZ NEHOR SORTZEN
42. INFORMAZIOA BOTEREA DA
43. INOREN ZER ESANGOAK LOTZEN DIZKIZU ZANGOAK
44. INORK INBIDIARIK EZ BADIZU, GUTXI BALIO DUZU
45. IRAINIK EZ EMAN INORI
46. JAINKOAK EZ BADU NAHI, SAINDUAK AHAL GUTI
47. JAUREGIKO KONTUAK, ASTIRO
48. JOKU, DANA TXARRA
49. JOLAS* BATEK, BESTEA / *hitz
50. KAIOLA DEUS EZ XORIA GABE
51. KANPO EDER, BARREN HUTS
52. KEAREN BELDURREZ, SURAT IHESI
53. KENDU TA IPINI EZ, AKABAU
54. KONFIANTZA EZ BEHIN BAIZIK GALTZEN
55. LAGUNA, LAGUN ZAKIDAZ INTXAUR BERDIAK JATEN
56. LANA, OSASUNA
57. LEGE GUZTIAK BERE TRANPA
58. LEKU GAITZIAN EGUR DAGIANAK SOINAZ EKARRI BEHAR
59. MAITASUNAK DENA LEUNTZEN DU
60. MANDOAK, EZ BADU POTRORIK, EZ POTRO-MINIK ERE
61. MEMORIA PLAKOA DA BATZUETAN
62. MENIAGATIK, IZKILURIK EZ ITZI
63. MIHI DUENA BETI HELTZEN DA PARISERAT
64. NAHI BADUZU ONGI BIZI, GAURKO AFARIA BIHARKO UTZI
65. NAHI EZ DUENAREN AFARIA BETI PREST
66. NAHI IZATEA DA AHAL IZATEA
67. NON ZALDARRA, HAN ATZAMARRA
68. NORBAITEK BEHAR GALDU, BERTZIAK IRABAZTEKO
69. OGIRIK EZEAN, ARTOA GOZOA DA
70. OIHAL ZURIAN ERORTZEN DA MANTXARIK HAUNDIENA
71. OLGETAN HASI ETA BENETAN AMAITTU
72. OTSOAK BASOAN GUTXI, BAINA ASKO HIRIAN
73. PAZIENTZIA, ZAURI GUZIEN GOZAGAILU
74. PEZETIAGATIK, DURORIK EZ
75. PIXKE TA PIXKE, PUSKE
76. SAGARDORIK ONENAK, HAMARREN SAGARRAKIN
77. SALDU ORDUKO, DAMUTU
78. SANTO TOMASEKO FERIYAK, ETXE ASKOTAN KOMERIYAK
79. SASIAK BELARRIAK DAUKAZ
80. SENAR JELOSKORRA, HOBE ITSU ETA GORRA
81. TONTUA IZATEKO EZTAO ESTUDIAU BIHARRIK
82. TXINTXARRI MIHIGABEA, SASIAN USTELDU
83. ULITXEK LEHOINA EROARAZTEN
84. UR GELDIAN EZ EZAR OINIK EZ ESKURIK
85. URRUNDIK MENDIA XUT; HURBILAGO ETA MALDA MALTSOAGO
86. URTEAN BEHIN DA PAZKO
87. USTEA EZ DA JAKITEA
88. XERRIARI EMANA EZ DA GALDUA
89. XILO BERRIAK EZ DU ZAHARRA TAPATZEN 90. ZAHAR-GAZTEAN EZ DAGO HILTEA
91. ZAKUR HILA BIÑO, KATU BIZIA HOBE
92. ZENBAIT ALDIZ, ON DUGU DAZKIGUNEN AHANZTEA
93. ZER ESAN BETI DAGO, ZER JAN EZ
94. ZER IKUSI, HURA NAHI
95. ZINTZOA, BETI POZIK
96. ZIRUJAU ONAK ERDI-ERDITIK EBAKITZEN DU
97. ZOAZ ERROTARAT, IRINA LOTUKO ZAIZU
98. ZUHURRAK ERGELEN LEPOTIK BIZI DIRA
99. ZURGINAREN ETXEAN ESKAILERA ZAHARRAK
100. ZURRUT ETA PURRUT ERA BATERA EZIN LEIZ