Bogan dago turismoa Sopelan! Bertako Turismo-bulegoak jakinarazi duenez, Aste Santuan bisitarien kopurua bikoiztu da Sopelan. Iaz turismo-bulegoek bost egunean 155 kontsulta izan zituzten, eta aurten, ostera, 315 dira bulegoetara gerturatu diren turistak. Bisitari gehienak Euskal Herrikoak izan dira, eta galderak, batez ere, hondartzen eta ibilbide naturalen ingurukoak izan dira.
Turismo-bulegoak nabarmendu duenez, Aste Santuko datuak ez dira kopuru isolatuak izan, joera baten adierazleak dira. Izan ere, 2015. urte osoan hilabetero ia-ia iazko kopuruak bikoiztu dira herrian: urtarrilean 249 izatetik 378 izatera, otsailean 188tik 411ra, eta martxoan 346tik 612ra. Azken urteetan, hondartzaz eta surfaz gainera, Sopelako Udala ahalegindu da turismoa bultzatzeko udalerriko bestelako ezaugarriak indartzen: burdin hesiko aztarnak, ibilbide naturalak, herriko kultur eskaintza, taberna-giroa, eta abar. Horrez gainera, maiatzean karabanentzako Uribe Kostako lehenengo aparkalekua zabalduko dela azpimarratu dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.