Apo lasterkaria babesteko asmoz, asteburu honetarako jardunaldi bikoitza antolatu dute Aranzadik eta Sopelako Udalak elkarlanean. Barikuan, 21:30etik aurrera bisitaldi gidatua egingo dute Barinatxe inguruan, apoa gertutik ezagutzeko erronkagaz. Izan ere, anfibio hori gauez baino ez da irteten. Zapatuan, berriz, lan egiteko ordua helduko da: goizeko 10:30etik aurrera apoarentzat putzu bat egokituko dute, hondartzaren goiko aldean.Izen-ematea itxita dago.
Azken urteetan, Sopelako kostaldera heldu da oso berezia den bizilagun berri bat: apo lasterkaria. Anfibio hori Gorrondatxetik Barinatxera mugitu da azken aldian, eta bere habitat berria egokitzeko asmoz, hitzarmena sinatu dute Aranzadi Zientzia Elkarteak eta Sopelako Udalak. Pasa den urtean, Aranzadiko teknikariak mugimendu horren arrazoiak aztertzen ibili ziren, eta orain habitat berriaren ingurua atontzen hasiko dira, apoa babesteko asmoz.
Kinka larrian
Gaur egun apo lasterkaria euskal kostaldeko leku bitan baino ez da bizi: Txingudiko badian eta Gorrondatxe eta Barinatxe hondartzen artean. Aranzandik nabarmendu duenez, “oso egoera larrian bizi da”, espezieak oso espazio gutxi duelako bizirauteko: “sasoi batean, eremu zabalago batzuetan bizi zen, baina murriztu egin dira. Beraz, beharrezkoa da eurentzako habitat egokiak sortzea”.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
