Sopelako auzotarrek, baita herrira hurbiltzen diren bisitariek ere, aukera izango dute herriko labarrak bertatik bertara ezagutzeko, abuztuan. Izan ere, turismo-bulegoa bisita gidatuak antolatzen dabil, zertarako eta Sopelako kostaldeko amildegi harrigarriak ezagutarazteko. Bisita horietako lehena uztail hasieran egin da, baina egongo da beste aukerarik ere parte hartzeko; hain zuzen ere, datorren hilean: abuztuan bisita bi egingo dituzte, hilaren 2an eta 30ean. Beraz, biak izango dira domekan, eta 11:00etan hasiko dira.
Halako bisita gidatuak aspaldi antolatzen ditu Sopelako turismo-bulegoak, udalerrian turismoa bultzatzeko helburuagaz eta herriak dauzkan hainbat ezaugarri agerian jartzeko. Gainera, geologiaren ezagutza indartu eta memoria historikoa bultzatzen dute ekimen horregaz.
Baina adi ibili; izan ere, bisitetan parte hartu gura izanez gero, aurrez izena eman beharra dago. Horretarako, turismo-bulegora jo daiteke (Loiola Ander Deuna, 28) edo, gurago bada, Larrabasterrako informazio-puntura (Aretxabaleta enparantza, 1). Bertaratzerik ez duenak aukera du telefonoz eta Internetez ere izena emateko: utzi mezua 94 406 55 19 telefono zenbakira deituz, edo igorri mezua turismo@sopelana.eus helbide elektronikora.
Azkenik, bisita gidatuen prezioari dagokionez, kontuan hartu 3 eurokoa izango dela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.