Afrikar eta errusiar dantzak, domekan, Larrabasterran

Iker Rincon Moreno 2015ko uzt. 25a, 10:53

Soweto Thabisong Dance Company. © SOPELAKO UDALA

Domeka arrastirako planik ez daukazu? Ikuskizun ederra izango da Larrabasterran. Auzoko jaiak amaitu berri daude, baina aste akabu honetan hitzordu polita izango da bertan. Izan ere, urtero legez, Sopelako Nazioarteko Dantza Jaialdia egingo da, 20:00etatik aurrera, Urgitxieta plazan (euria bada, Urko kiroldegian egingo dute dantza-erakustaldia). Ohi den legez, hiru dantza-taldek parte hartuko dute, eta kolorez betetako ikuskizuna eskainiko dute. Oraingoan, gertukoen taldea Galdakaotik iritsiko da: Andra Mari dantza-taldea. Beste talde biak, ostera, urrunetik: hegoaldetik, Soweto Thabisong Dance Companyko dantzariak etorriko dira, Hegoafrikatik; iparraldetik, berriz, Ensemble Folklorique National Italmas taldeko lagunak iritsiko dira, Udmurtiar Errepublikatik (Errusiatik).

Andra Mari Eusko Dantzari Taldea 1955ean sortu zuten Galdakaoko zenbait gaztek, eta ordutik hona, euskal dantzak eta kultura ezagutarazi dituzte, Euskal Herrian eta munduan barrena. Bere lan-interesak garatzearen ondorioz, Euskal Herri osoko erritu, musika eta dantza zaharrak ikertzeari, ikasteari eta berreskuratzeari ekin zion Andra Marik, eta errepertorio luzea eta zabala osatu dute.

Kanpoko talde biei dagokienez, euren dantzak gogoko badituzu, berriro ikusteko aukera izango duzu. Izan ere, beste hainbat folklore-jaialditan parte hartuko dute-eta datozen asteotan.

Kultura Sopela

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun