Gertaera eguenean, irailak 10, jazo zen, 10:30ak aldera. Sopelako Udaltzaingoaren arabera, substantzia estupefazienteak kontsumitzeagatik eta txikizkako salmentagatik "ezagutzen" dituzten gazte bi lokalizatu zituzten, ikastetxe publiko baten inguruan. Polizien behaketa lanez ohartuta, ustez, gazteetako batek arropa artean zerbait gorde zuen eta polizien begi-bistatik kentzen saiatu ziren. Arropa artean sei zati haxix antzeman zizkiotela zabaldu du Udaltzaingoak: zati handi bat eta bost zati txiki, antzekoak, zelofanetan bilduta eta, ustez, saltzeko prest. Substantzia estupefazienteak manipulatzeko tresnak ere antzeman omen zizkioten. Horregatik, Osasun Publikoaren kontrako ustezko delitua leporatu zioten 20 urteko Sopelako bizilagunari.
Sopelako Udaltzaingoa antzeko ekintzak egiten dabil txikizkako salmenta, bide publikoan droga kontsumitzea, eta debekatutako armen edo objektu mingarrien jabetzaren kontra. 2015ean, agenteek 79 konfiskatze egin dituzte, gehienak ustez drogak edukitzeagatik edo kontsumitzeagatik. Horiei gehitu behar zaizkie hiru atxiloketa eta atzoko gertaera.
Udaltzaingoak konfiskatze bakoitzaren akta helarazten die Eusko Jaurlaritzako Segurtasuna Koordinatzeko saileko zuzenbide-zerbitzuei, zertarako eta dagokion administrazio-espedientea tramitatzeko, Herritarren Segurtasuna Babesteko Lege Organikoaren arau-hausteengatik. Arau horren zigorren atalean zehazten denez, arau-hauste arinak 100 eta 600 euro arteko isunagaz zigortzen dira, larriak 601 eta 30.000 euro arteko isunagaz, eta oso larriak 30.001 eta 600.000 euro arteko isunagaz. Droga-trafiko kasuetan epaitegiek ezartzen dituzte zigorrak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
