Sopelako Udaltzaingoak lapurreta saiakera bat egotzi dio 35 urteko bilbotar bati, ustez Bizkaiko Foru Aldundiaren ibilgailu batetik hainbat gauza osten saiatu eta gero. Ibilgailua aparkatuta zegoen, langileek garbiketa-lanak egiten zebiltzan bitartean. Irailaren 29an, 16:12ak aldera, Udaltzaingoaren egoitzan telefono bidezko abisua jaso zuten. Udal iturriek diotenez, Sopelako kosta gainetik parapenteagaz hegan zebilen pertsona batek eman zuen informazioa: gizon bat lur orotako ibilgailu batean sartzen eta barrua nahasten ikusi ei zuen.
Udaltzainak bertaratu ziren eta bilbotarra lokalizatu zuten Solondota kalean, ustez Aldundiko langileengandik ihesi zihoala, eurek ibilgailuan ustekabean atzeman ostean. Udaltzaingoaren arabera, une batzuk lehenago, ustezko lapurrak ibilgailutik hartutako bi telefono mugikor eta MP3 gailu bat bota zituen. Era berean, gorputza arakatu ostean, udaltzainek 80 euro atzeman zizkiotela jakinarazi dute, antza, Aldundiko langile baten diru-zorrotik hartutakoak.
Getxoko Justizia Jauregian epaiketarako data zehaztu da, epaiketa azkarraren prozesuaren bidez. Udaltzaingoaren arabera, antzeko delituak egiteagatik aurrekari ugari dauzka bilbotarrak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.