"Parte-hartzea giltzarri izan beharko luke udal jardueran. Sopeloztarrok aukera izan beharko genuke gure udalaren funtzionamenduan eragiteko. Gure eskubidea da", uste du Sopelako EH Bilduk. Gauzak horrela, azken hilabeteetako Ogasun alorreko batzorde informatiboetan, koalizioak aurrekontuen kanpainaz galdetu dio EAJri, egun PSE-EEgaz batera udal gobernuan dagoen alderdia. Kanpaina horren izaera parte-hartzaileaz ere galdetu egin zaie. "Egun, ez dago erantzun garbirik kanpaina horretan ahalbideratuko den parte-hartzeaz", aipatu dute ezkertiarrek. Sopelako EH Bilduk gogoratutakoaren arabera, "EAJk hauteskunde-kanpainan parte-hartzea aldarrikatu zuen bere programaren elementu garrantzitsu gisa".
Udal Gobernutik kanpo ere aurrekontu parte-hartzaileak landuko ditu Sopelako EH Bilduk
Azken urteetan egin bezalaxe, Sopelako EH Bilduk aurrekontu parte-hartzaileak diseinatzeko prozesua abian jarriko du datozen egunetan. "Udal gobernuan egon zein ez, EH Bilduk irizpide berdinak aplikatzen ditu", adierazi du koalizio ezkertiarrak Sopela.net agerkari digitalaren bitartez. Hala, martitzen honetan, azaroak 17, Larrabasterrako Iberre institutuan egingo dute informazio-bilera; eguaztenean, hilak 18, Arriaterako klub sozialean; eguenean, hilak 19, Kukullu- Sopelmarreko klub sozialean; eta azkenik, hilaren 23an, astelehena, Sopelako erdigunean. Batzar denak 19:00etan izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun