Zigor Merodio preso politiko bilbotarraren "Aldharrikatuz" eskultura-erakusketa Kurtzio kultur etxean egiteko baimena ukatu du Sopelako Udal Gobernuak, bertoko EH Bilduk Sopela.net agerkari digitalaren bitartez salatu duenaren arabera. Aipatutako webguneak dioenez, daborduko finkatuta zegoen erakusketarako data: maiatzean, udal hauteskundeetako kanpainan sartuta, Merodioren eskulturak ikusgai jartzeko aukera eskaini zitzaion orduan Udal Gobernuko buru zen EH Bildu koalizioari; eta libre zeuden datak begiratu ostean, azaroa erreserbatzea erabaki zuten. Hala ere, gaur eguneko udal agintariek (EAJ eta PSE-EE) erakusketa egiteko aukerarik ez dute eman, "gai sentibera" dela eta "garaia ez" dela argudiatuz.
Azaroaren udal batzarrera begira, EH Bilduk mozioa aurkeztuko du Udal Gobernuari bere erabakia bertan behera utz dezala eskatuz. Koalizioaren salaketaren ostean, "ze aukera dagoen aztertzeko, txostena eskatuko duela" iragarri omen dute EAJk eta PSE-EEk, Sopela.net agerkariaren arabera.
Zigor Merodioren "Aldharrikatuz" erakusketa tamaina txiki zein ertaineko hainbat eskulturek osatzen dute; Alaitz Areitio (Abadiño) eta Jon Troitiño (Donostia) preso politikoek idatzi dituzte testuak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!