Joan den astelehenean, abenduak 14, 17:00ak aldera, prebentziozko errepide-kontrol bat jarrita zeukan Sopelako Udaltzaingoak; Loroño eta Sipiri kaleetako gurutzebidean oinezkoak harrapatzea ekiditea zen helburua. Antza, kontroletik igaro zen auto bateko gidaria segurtasun-uhal barik zihoan eta udaltzainek geratzeko agindu zioten. Bertoko Poliziaren arabera, arau-haustea salatu ostean eta bideari berriro ekitekotan zegoenean, bat-batean, gidariak jarrera urduria eta erasokorra erakutsi zuen. Ustez, bere autoa patruila-autoaren kontra eta hirugarren auto baten kontra kolpatu zuen; jarraian, gelditzeko eskatzen zebilen udaltzain bat hainbat metroz arrastaka eroan omen zuen.
Udaltzainek gidaria atxilotu zuten, Sopelako 45 urteko bizilaguna. Haren aurkako epaiketa azkarra egiteko data zehaztu da, ondoko delituak egitea leporatuta: desobedientzia larria eta polizia-agente baten aurkako erasoa. Udaltzainak zauri arinak izan zituen ukondo batean, eta ondoren, mutua batean artatu zuten, beti ere Sopelako Udalak zabaldutako bertsioaren arabera.
Kontrolari dagokionez, lehen aipatutakoa eskola-ibilbidean kokatutako oinezkoen pasabidea da eta, Udaltzaingoak dioenez, batzuetan, gidariek ez dute errespetatzen adin-txikikoen lehentasuna.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
