Gaur goizean, Sopelako Ander Deuna ikastolan jokatu dute Ipar Uribeko bertsolari gazteen derbia. Bizkaiko Bertsolari Gazteen BBK Sariketan, Uribe Kostako taldeak aurre egin dio Txorierri eta Mungialdeko neska-mutilek osatutako Uribe Butroeko multzoari. Irabazlea etxeko taldea izan da, Uribe Kosta, 415 puntugaz, guztira; Uribe Butroeko taldeak 397,5 puntu lortu ditu.
18 urtera artekoetan, Uribe Kostaren ordezkaritzat abestu dute Irene Ezkurra Erisek, Aritz Landeta Terceñok eta Unai Mendiburu Valorrek. 24 urtera artekoetan, ordea, Inazio Vidal Gurrutxaga, Paule Loizaga Legarra eta Peio Arondo Barandiaran izan dira eskualdeko ordezkariak. Kanporaketa irabazita, hurrengo fasera pasatuko da ALBEko armada, eta martxoaren 8an Zallan jokatuko den finalaurrekoan parte hartuko du.
Uribe Butroeko taldean honakoek abestu dute: Ainhoa Gorostiaga, Iker Larizgoitia, Leire Amenabar, Jon Larrabide, Peru Berasategi eta Malen Amenabar.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
