Eguerdiko 13:25ak aldera, Sopelako udaltzaingoek zenbait bidaiari zeramatzan ibilgailu bat gelditu zuten Urgitxietako biribilgunean, Bide Segurtasunerako Plan Estrategikoaren barruan dagoen kontrol bat egiten zebiltzan bitartean. Udal iturriek diotenez, horietako bat kokoriko eserita zegoen; desmuntatzen zen atzealdeko jesarleku bat kenduta zeukan.
Pertsona horren azpian, erdi-ezkutatuta, sorgailu bat aurkitu ei zuten. Erreminta honen eta zaku batean zeuzkaten bestelako tresnei buruz galdetuta, ez zuten hauen jatorriari buruzko erantzunik eman ahal izan, polizia iturriek gaineratu dutenez. Ondorioz, badaezpada, material denagaz geratu ziren udaltzainak, lapurreta kasu bat izan zitekeelakoan.
Erreminta horien jatorria aztertu ostean, sorgailua Urdulizko Udalaren kamioi batetik ostu zutela argitu zen. Kamioia udaletxe inguruan aparkatuta zegoen bitartean lapurtu omen zuten.