Hainbat lekukoren arabera, otsailaren 6an, 23:00ak aldera, Sopelako Goiene kalean aparkatuta zegoen auto bati marrak egiten ibili omen zen bizilagun bat. Udal iturriek diotenez, egindako ikerketaren emaitzei eta bestelako testigantzei erreparatuz, 2011tik, denera 29 salaketa egon dira. "Ibilgailuek jasandako marken parekotasuna handia da eta kalte guztiak, egun identifikatua eta ikertua den pertsonaren etxebizitzatik hurbil egindakoak direla ere argitu da", gaineratu dutenez. Kalteen batez besteko zenbatekoa 500 euro ingurukoa da.
Lekukoen eta ibilgailuaren jabearen testigantzak jaso ondoren, azken urteetan udalerriko erdigunean aparkatutako ibilgailuek jasandako kalteak zenbatu eta arrazoiak argitzeko ikerketa bat zabaldu zuen Sopelako Udaltzaingoak. Atestatua Getxoko Guardia Epaitegira igorri da. Bertan, bizilagun hori ikertu gisa ageri da, ustez auto guzti horietan egindako kalteen erantzulea izan daitekeelakoan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!