Aurkezleek oniritzia eman zioten, eta Udal Gobernuko kideek, abstentzioa. Udal idazkariak bakarrik ipini zituen artikulu batzuk koarentenan, testuaren literaltasunak balizko herri-kontsulta bat oztopa dezakeelakoan, edo alkateak Urdulizen aurkako helegitea atzera bota duelako desadostasuna agertzea alkatearen eskumenak inbaditzea delakoan. Alkatearen ustez, sarbideengatik Urdulizen aurkako helegiteari eustea “dirua xahutzea” zen.
SUSAN eta Urduliz Rurala taldeen ordezkariek nabarmendu zutenez, pozik daude etxetik gertu ospitale berria izateagatik, baina ohartarazi zuten eragingo duen trafikoak udalerri bietan arazo larriak sortuko dituela. Horregaz bat eginez, Sopelak Foru Aldundiari galdetuko dio ea zer konponbide prestatzen dabiltzan, eta zer egin duen orain dela urtebete baino gehiago eman zion txosten teknikoagaz. Aldundiari, Osakidetzari eta Garraio Partzuergoari ere eskatuko die Sopelako Udalak sarbideen eta aparkalekuen arazoa konpontzeko eurakaz eta Urdulizeko Udalagaz bil daitezen. Mozioan, Bizkaibus eta Metro Bilbaoren maiztasunak handitzea ere eskatu dute, baina hori egun batzuk lehenago egin zuen Udal Gobernuak. Azkenik, Udalak prozesu parte-hartzaile bat ipiniko du martxan.