Aste-akabuan Euskaldun Sariketaren edizio berria hasiko da Barrundia eta Balmasedako probakaz. Sopelako Lointek taldea ahaleginduko da Alicia Gonzalezek aurreko edizio bietan lortutako saikapen nagusiko txapela taldean geratu dadin. Helburu horregaz, Emilio Ramos Ugeraga txirrindularitza-elkartearen zuzendariak honako taldea deitu du: Eider Merino, Belen Lopez, Rocio Garcia, Maria Calderon, Empar Felix, Cristina Martinez eta Teresa Ripoll.
Zapatuan, Araban izango da sariketaren estreinaldia; irteera eta helmuga Ozaetan izango dira, udaletxearen aurrean. Barrundiako proba horretan, txirrindulariek 19,6 kilometroko zirkuituari lau bira emango dizkiote, Maturana eta Herediako gainetatik igaroz.
Domekan, ordea, Balmasedan izango da proba. Eider Merino txirrindulari laranjak etxean jokatuko du eta iaz lortu zuen txapela errepikatzen saiatuko da. Ibilbidea 73,8 kilometrokoa izango da. Hasieran, hiru bider pasatuko dira Malabrigotik, eta azken 20 kilometrotan bi mendate garrantzitsu izango dituzte: Avellanedakoa eta Herbosakoa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
