Proposamenak koalizio ezkerzalearen eta Orain Sopelaren aldeko bozka jaso zuen. EAJ, PSE-EE eta Denok Batera abstenitu ziren. Horren ostean, OHZren arautegi osoa bozkatu zuten, EH Bilduren emendakina barne; arautegia aurrera atera zen EAJ, PSE-EE eta EH Bilduren bozkakaz. Denok Batera berriro abstenitu zen eta bigarrenean Orain Sopelak ezetza eman zuen.
Maiatzaren 18ko foru-arau berriak aukera ematen zuen, lehenengo aldiz, %50 arteko gain-ordaina ezartzeko etxebizitza hutsei. Sopelako Udal Gobernu Taldea osatzen duten EAJk eta PSE-EEk, ordea, uko egin zioten eskaera honi eta gain-ordaina ez zegoen jasota prestatutako arautegian. Hala, emendakina aurkeztu zuen EH Bilduk.
Koalizio ezkerzalearen ustez, "hainbat atal garatu behar dira oraindik; hala nola, ezar daitezkeen hobariak". Horri ekingo dio irailetik abendura bitartean; arautegia indarrean sartuko da 2017ko urtarrilean.