Hirugarrenez egingo dute Sopelan, irailaren 22tik 25era, natura, surfa eta musika ardatz dauzkan jaialdia. Besteak beste, surf egokituan, gainontzeko surf ikastaroetan, parapente-hegaldietan eta lehen sorospen ikastaroetan izena emateko epea irailaren 18ra arte egongo da zabalik. Burdin Heziaren inguruko bisita gidatuari, itsaslabarretako eta itsaso arteko ibilbideari eta umeentzako hainbat tailerrei dagokienez, irailaren 21a izango da izena emateko azken eguna.
Daborduko udaletxeko plazako oholtzara igoko diren musika-taldeen izenak ezagutzera eman ditu Udalak; sarrera doan izango da eta bederatzi taldek eta DJ batek abestuko dute. Hala, La Pulqueria, Hey Mr. Neken, Rural Zombies, Sorkun, Esne Beltza, The Clams Madrilg, Dead Bronco eta The Great Barrier bandek joko dute, eta Dj Göo nafarraren disko-saioak itxiko du kontzertuen egitaraua. Hala ere, musika baino gehiago da Sopela Kosta Fest.
Informazio gehiago: sopelakostafest.com
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!