Iker Artetxe Bas "Piwi" 34 urteko sopeloztarra hil zen itota pasa den domeka arrastian Lanzarote irlan, Kanarietako Gobernuaren Segurtasun eta Larrialdietarako Zuzendaritza Nagusiak jakinarazi duenez. Artetxe desagertu zen Teguise udalerriko Famara kalaren aurreko uretan, 17:40ak aldera, surfa egiten zebilela; gerora, San Juan hondartzan lagun batek erreskatatu zuen, eta sorosleak suspertzen ahalegindu ziren. Lan horretan jarraitu zuten 30 minutuz Kanarietako Larrialdietarako Zerbitzuek; baina, azkenean, heriotza egiaztatu behar izan zuten.
Uribe Kostan, tristezia eragin du ezbeharrak. Besteak beste, "Meduxa" surf-aldizkari sopelozatarrak agurtu du herrikidea. "Salitre" magazinak, bere aldetik, "besarkada handi bat" igorri die Artetxeren sendiari eta bere lagunei. Sopeloztarraz gogora ekarri dute "pertsona zorgarria" zela, "ahoan beti irribarrea zeukana".
Lanzaroteko komunikabideen arabera, Artetxe oporretan zegoen lagun bategaz. Iturri horien arabera, balizko epilepsia episodio bat izan liteke kontzientzia galtzea eta heriotza eragin zuen kausa. Halere, Guardia Zibilak eta epaileak oraindino ez dute autopsiaren gaineko datu ofizialik eman.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
