Sopelako lekurik esanguratsuenak eta horietan aurkitu daitezkeen ondareen berri emateko ibilaldi toponimikoa antolatu du Udalak. Ibilbidea osatzeko, Uribe Kostako Zerbitzu Mankomunitateko Euskara Zerbitzua, Labayru Ikastegia eta Udala bera ibili dira lanean, udalerriko hainbat herritarren laguntzagaz batera. Ibilbidea bera zein izango den aurkezteko, abenduaren 1ean, eguenean, aurkezpen ekitaldia egingo dute, Kurtzio kultur etxean, 19:00etatik aurrera.
Antolatzaileek jakinarazi dutenez, ibilbideotan Sopela eta bertako itsaslabarren ondare geologikoa, gerra zibilak utzitako ondare historikoa, ondare naturala, etnografikoa eta toponimikoa ezagutzeko aukera egongo da, besteak beste.
Ibilaldiak udaletxeko plazatik abiatuko dira, eta itsaslabar ikusgarrietarantz joango dira parte-hartzaileak. Bertan, Ikatzaren plaia, Meñakoz eta Atxibiribileko ondareak ezagutu ostean lehorrera bueltatuko dira. Era berean, Larrabasterrako baserriak, Urkomendi, Fraidemendiko munarria eta Bilbo Handia gerra zibiletik babesteko eraikitako burdinezko hesia ezagutuko dituzte, besteak beste.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.