Sopelako EH Bilduk azaldu duenez, koalizioak mozio bi aurkeztu zituen joan den eguenean, urtarrilak 26, bozeramaileen batzordean: elektrizitate-horniketaren inguruko proposamen bat eta kartoien zein paperen bilketaren inguruko beste bat. "Gure asmoa, bi proposamen horien inguruan plenoan bertan eztabaidatzea zen eta ondoren, alderdi politiko guztien artean erabakitzea proposamen horiekin aurrera jo edo ez", adierazi dute ezkerzaleek.
Baina, azaldu dutenez, egunean bertan Gontzal Hermosillak alkatetza-dekretu bat kaleratu zuen, osoko bilkuraren gai ordena finkatuz. "Bertan ez dira agertzen Bilduren bi mozioak: Sopelako alkateak ez ditu onartu osoko bilkuraren atal erabakitzailean (hau da, plenoaren eztabaidarako, bozketarako eta erabakitzeko tartean). Beraz, erregu, galdera eta mozio ez erabakigarrietan sartuko dira", kritikatu dute EH Bildukoek.
Bestalde, koalizioak baieztatu duenez, urtarrilaren 30ean Sopelako Udalaren zerbitzu juridikoen txosten bat jaso zuten, mozio biak udal-batzarraren "atal ez erabakitzailean" sartzearen arrazoiak argudiatuz: "alkateak du osoko bilkuraren gai ordena finkatzeko eskumena".