Aurreko ikasturteetan legez, euskal dantzen ikastaroa izango da Sopelan aurten ere, Udalak antolatuta, Uribe Kosta Mankomunitateko Euskara Zerbitzuagaz elkarlanean. Izena emateko epea irailaren 4an zabaldu eta irailaren 22an itxiko da. Interesdunek, izena eman ahal izango dute Sopelako udaletxean, Sopelarinen, Kurtzio kultur etxean eta udal-webgunean.
2017-2018 ikasturteko ikastaro hori, urritik ekainera bitartean garatuko da. Ordaindu beharreko zenbatekoari dagokionez, ikastaroak 70 euroko prezioa du eta diru-kopuru hori urriaren 2tik 13ra bitartean ordaindu beharko dute inskribatutakoek. Aurreko ikasturtean legez, Iberre institutuko gimnasioan izango da ikastaroa, 18:00etatik 21:00etara, talde bitan banatuta:
18:00etatik 19:30era oinarrizko maila dutenentzako txanda.
19:30etik 21:00etara maila aurreratua dutenentzako txanda.
Datorren urriaren 4a, asteazkena, aurkezpen eguna izango da. Hitzordu horretara ere, apuntatutako pertsonek duten mailaren araberako hitzordua izango dute: oinarrizko mailakoek, 18:00etan; eta maila aurreratukoek, 19:30etan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
