Sopelako Udaleko Bozeramaileen Batzordeak urgentziazko eta ohiz kanpoko bilera bat egin zuen atzo, eguaztenean, joan den uztailaren 30ean PSE-EEren egoitzaren aurka egindako pintaketen kontrako adierazpena adosteko. Batzordeak gaitzespen-oharra onartu zuen, "kideen gehiengo babesagaz", udal-iturriek jakinarazi dutenez. Hala, Sopelako Udaleko Bozeramaileen Batzordeak "indarkeriazko istilu guztiak" gaitzetsi ditu; eta, era berean, alderdi sozialistari "elkartasuna eta euren disposiziora dagoela" adierazi dio, "bere eskubide politikoak askatasun osoz egikaritu ahal izateko". [Argazki-galeria].
Lehenik eta behin, Sopelako Udaleko Bozeramaileen Batzordeak "erabateko gaitzespena" adierazi du "ilegalak, bortitzak, mehatxatzaileak eta iraingarriak" diren gertakari hauen aurrean. Bestalde, alderdi politiko sopeloztarren ustez, "horrelako gertaerek ez dute inolako justifikaziorik; ez dute balio kutsu politiko edo sozialak dituzten aldarrikapenak egiteko". "Etikoki, beldurra sorrarazteko ahaleginetan egindako ekintza onartezina da. Politikoki, agerian uzten du autoreen izaera antidemokratikoa eta ekonomikoki, sopeloztar guztien ondareari egiten die kalte", irakur daiteke adierazpenean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
