Sopelako Udalak bigarrenez antolatuko du Sopela Businnes Market, datorren azaroaren 9an eta 10ean, Kurtzio kultur etxean. Udal-iturriek zabaldu dutenez, negozio-merkatu hori "Sopelako eta eskualdeko ekintzaile-proiektuak bultzatzeko topagunea" izango da; bertan izango dira zenbait eragile, instituzio, inbertsore, ekintzaile, enpresa eta aditu, "sustapen ekonomikoa eta enpleguaren sorrera indartzeko", udal-iturrien arabera.
Bigarren edizioan berritasunak izango direla iragarri du Teresa Fernández Enplegu eta Sustapen Ekonomikorako zinegotzi sozialistak: "egun bira zabaldu dugu ekimena", joan den urtarrilean egindako azoka "arrakastatsuan" parte-hartzaileek "denbora gehiago" eskatu zutelako. Modu berean, "protagonismo handiagoa eman diegu Interneteko lan-topaketei". Azoka doakoa izango da, baina aurretik izena eman beharra dago.