Joan den eguenean, urriaren 18an, Euskaraldiaren Sopelako hamaikakoa osatzen duten pertsonen zerrenda aurkeztu zuten Jauregizar plazan. Hauek dira, besteak beste, kide horien izenak: Joseba Iriondo (kazetaria), Nobuko (sushi-woman Milagros tabernan), Oier Arakistain (Desobeditzen taldeko abeslaria), Bene Markaida (irakasle ohia eta sopeloztarra), Aida Moral (kadiztarra eta euskaraz berba egiteko prest), Xabier Saitua (Sopelako argazkilaria), Mikel Barba (musikaria), Leire Ucha (aktorea), Aritz Aduriz (futbolaria), Jose Angel Iribar (futbolari-ohia) eta Miren Dobaran (Eusko Jaurlaritzaren Hizkuntza Politikako sailburuordea).
Hamaikakoa, hamaika laguneko taldea da modu pertsonalean eta borondatez "Euskaraldia: 11 egun euskaraz" ekimenean parte hartzea erabaki dutenak Belarriprest eta Ahobizi rollen bitartez.
Hariez gainera, Sopelan herritarrek osatutako hainbat talde eragile mugitzen dabiltza ekimenagaz bat egiteko eta ekimena bera sustatzeko, garatzeko eta zabaltzeko (udal-euskaltegia, musika-eskola, Beone Sopela, Kaleka antzerki-taldea, Ander Deuna Ikastola, Kurene Eskola, Zipiriñe ikastetxeko gurasoen elkartea, Meñakoz Taldea, Peña Txuri Surf Taldea, Ugeraga Futbol Taldea…). Orain arte, taldeek hainbat jarduera burutu dituzte eta daborduko ehunka sopelaztarrek eman dute izena ekimenean parte hartzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
