Ekonomia  Sopela 2018-11-13 11:00

Sopelako enpresen ekintzailetza sustatzeko dirua emango dute

Enplegu eta Sustapen Ekonomikorako sailaren bitartez, Sopelako jarduera ekonomikoa bultzatzeko diru-laguntzen deialdi berri bat abiarazteko 16.000 euro inguru bideratuko ditu bertoko Udalak. Eskariak aurkezteko epea eguenera arte egongo da zabalik, azaroaren 15era arte.

Sopelako enpresen ekintzailetza sustatzeko dirua emango dute
Teresa Fernandez zinegotzia. © PSE-EE | Ikusi handiago | Argazki originala

Diru-laguntza lerro honen helburua, enpresa proiektu berrien sorrera bultzatzea da, Sopelan helbide fiskala, soziala eta lantokia izan eta sorrera berrikoak diren enpresei beraien  jarduera martxan ipintzeko beharrezko inbertsioetarako diru-laguntzak ematea, alegia.

Teresa Fernández zinegotzi arduradunaren berbetan, "deialdi honekin, alde batetik, enpresa sortu berriei laguntza eman nahi diegu eta gaur egungo ekoizpen ehuna suspertzeko pizgarriak eskaini; eta, bestetik, komunitatearen beharrei erantzuna emango dieten eta gaur egungo ekonomian lehia dezaketen enpresa jarduera berriak babestu nahi ditugu".

Diru-laguntzak 2018ko urtarrilaren 1etik urriaren 30era artean martxan ipini diren enpresa proiektuetarako bideratuko dira.

Enpresa proiektu bakoitzerako, gehienez ere 3.000 euroko laguntza izango da, eta, zelangura ere, inbertsioaren %75a izan ahal izango da. Diruz laguntzen diren gastuei dagokionez, aipatzekoak dira informatikako aplikazioak, instalazio teknikoak, makineria, tresneria, altzariak edota informazio-prozesuetarako ekipamenduak, besteak beste.

Diru laguntzak eskatzeko inprimakia eta deialdiaren oinarriak interesdunen eskura daude www.sopela.eus webgunean eta udal-bulegoetan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa