Diru-laguntza deialdia Sopelan: bost arlotan jarduerak sustatuko ditu Udalak, 97.000 euro emanez

Emakumeen arloko jardueretarako emango dira laguntzak, besteak beste. © SOPELAKO UDALA

Lankidetzaren, emakumeen, kirolaren, kulturaren eta adinekoen arloetako jarduerak diruz laguntzeko deialdia egin du Sopelako Udalak. Eskabideak ekainaren 11ra arte egin daitezke, eta jasotako laguntza 2019. urtean jarduera horiek finantzatzeko izango da.

Zehazki, emandako dirua jarduerak egiten dituztenen gastuak ordaintzeko izango dira, baita garatutako jarduera-egitarauen ondoriozko gastuetarako ere.

Arloz arlo, hauek izango dira banatuko diren diru-kopuruak:

  • Kultur arloko jardueretarako: 40.000 euro
  • Lankidetza-arloko jardueretarako: 32.405,50 euro
  • Pertsona nagusien arloko jardueretarako: 12.000 euro
  • Kirol-arloko jardueretarako: 10.000 euro
  • Emakumeen arloko jardueretarako: 2.594,50 euro

Pertsona fisikoek nahiz erregistratutako elkarteek eska ditzakete laguntzok, Sopelan erroldatuta badaude (banakoen kasuan) edo egoitza udalerrian badute (pertsona juridikoenean).