Kurtzio Kultur Etxean asteburuetarako ikasketa-gela bat zabalduko du Sopelako Udalak

© SOPELAKO UDALA

Hilaren 15etik aurrera eta ekainaren 28ra arteko aste-akabuetan Kurtzio Kultur Etxeak gela bat eskainiko du ikasleentzat eta oposizioak prestatzen dabiltzanentzat. Hala, hainbat herritarrek egindako eskaerari erantzun gura dio Udalak. 25-30 pertsonarentzako lekua izango du aretoak.

Ikasgela berriak Udal Liburutegiak daborduko eskaintzen duen zerbitzua osatuko du. Horrez gain, asmoa dago martxotik aurrera liburutegiak bere ordutegia handitzeko, astelehenetik barikura 08:15etik 20:45era arte (jarraian) eta zapatuetan 08:00etatik 14:00ak arte.

Kurtzioko ikasketa-gela, aldiz, 11:00etatik 14:00etara eta 17:00etatik 20:00etara egongo da zabalik, zapatu eta domeketan; hala ere, itxi egingo dute zenbait jaiegunetan, aste santuan esaterako. Honen inguruan interes gehiago duten pertsonek 944 033 406 telefonora deitu dezakete edo bestela, kultura@sopela.eus helbidera mezua bidali.