Basque Teameko Leticia Canales surflariak hirugarren postu historikoa lortu du Sydney Surf Pro txapelketan

Denboraldi honetan Australian orain arte egindako lehiaketak ez dira emankorrak izan Euskal Herriko surflarientzat, baina gogotsu saiatzen denak lortu egiten du, eta hori gertatu zaio Leticia Canales sopeloztarrari.

Sopelako surflaria fisikoki ezin hobeto dago, eta emaitzak goiz edo berandu iritsi behar ziren. Manly Beachen izan da, bertan surf epikoa erakutsi du, presarik gabeko baina etenik gabeko errondak gainditzen lagundu diona, lasaitasunari eutsiz eta une bakoitzean erabaki egokiak hartuz. Canales txapelketan sartu zen lehen kanporaketan eta lan bikaina egin behar izan du txapelketako azken fasera heltzeko, munduko 60 surflari onenen aurka, lehiaketa horretan parte hartzen duten bakarrak.

Lehen fasean Nishimoto eta Hashimoto japoniarrak atzean utzi eta Molly Picklumegaz batera aurrera egin zuen. Bigarren kanporaketan MacGonagle eta Bulard erori ziren eta sopeloztarrak aurrera jarraitu zuen Johanne Defayrekin batera. Hirugarren kanporaketan, bi australiarrakaz zuen borrokan, Andrew kanporatu zuten, baina borroka gogorrena laugarren errondan iritsi zen. Leticiak Defay frantziarra gainditu zuen, CT zerrendako zortzigarrena. Final-laurdenetan Molly Picklumen aurka aritu zen berriro, eta oraingoan ere ez zuen amore eman. Leticiak 10.00ko puntuazioagaz gainditu zuen australiarra (9.23). Finalerdian Carissa Moore hawaiiarra izan du aurkari, ASP World Tourra lau aldiz irabazi duen surflaria. Carissak 13.07 lortu du finalerdietan, eta Canalesek 9.76.

Txapelketaren ondoren hitz egin du Leticiak Basque Teamekin, eta oso gustura agertu da egindako lanarekin. Lortutako 6.500 puntuak oso garrantzitsuak dira munduko sailkapenean gora egiten jarraitzeko, hirugarren postu historiko horren ondoren: "Azkenean iritsi da emaitza, eta zer nolako emaitza! Jatyr (bere entrenatzailea) eta ni oso pozik gaude. Sekulako txapelketa izan da eta txanda asko egin ditugu, batzuk hobeak eta beste batzuk txarragoak, baina beti erritmo onari eutsiz. Pena da Carissa Mooreren aurkako finalerdian erritmoa azken minutuetan hartu dudala, olaturik ez zegoelako, baina ametsa izan da harekin surfean aritzea, idoloa delako niretzat. Oso pozik nago!".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun