Udaltzaingoak lau pertsona ipini ditu ikerketapean marihuana landatzeagatik

Sopelako udaltzainek lau pertsona ipini zituzten ikerketapean atzo, Larrabasterrako Loiola Ander Deuna kaleko etxebizitza batean 33 marihuana-landare landatzeagatik.

Atzo goizean egin zuten udaltzainek operazioa, etxebizitza batean hainbat marihuana-landare zeudela ikusi ostean. Udalaren oharraren arabera, hazkunde-fase desberdinetako 33 landare topatu eta atzeman zituzten poliziek bertan. Hartara, lau pertsona ipini zituzten ikerketapean, landareok legez kanpo landatzeagatik.

Zehazki, Herritarren Segurtasunari buruzko Legearen araberako arau-hauste administratibo larria da mota horretako landaketak egitea. Dena dela, atzemandako landareak kukulu bakoak ziren. Kukuluan metatzen da THCa, kalamuak substantzia psikotropikoa, eta honenbestez ezin esan daiteke kasu honetan osasun publikoaren kontrako deliturik egon denik.

Auzia Getxoko guardiako epaitegira ailegatuko da bihar. Bertako iturriek zehaztu dutenez, atzo ikerketapean ipinitako pertsona horietako batzuen aurkako beste eginbide batzuk daude lehendik zabalik, arrazoi berdintsuengatik, eta oso litekeena da auzi biek bat egitea.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun