Kultur ekipamendu berrien gaineko iritzia eman ahal izango dute sopeloztarrek

Erabiltzailearen aurpegia Erredakzioa 2020ko irailaren 8a

Sopelako Udalak kultur ekipamendu berriak gura ditu. "Herritarrek gero eta ekipamendu eta zerbitzu gehiago eskatzen dutela ikusi dugu", azaldu dute, "dauden guneak egokitu eta zerbitzu gehiago eta hobeak hartzeko berriak eraiki nahi dira". Izan ere, laster ekipamendu berri horiek kokatzeko eraikin bat altxatzen hasiko direla iragarri dute, SOPELAB izena edukiko duena. Testuinguru horretan, udal-agintariek prozesu bat ipini dute martxan herritarrek gaiaz dituzten iritziak zuzenean jasotzeko.

Sopelan erroldatuta dauden denek parte har dezakete prozesu horretan, udal-webgunean topa daitekeen online galdetegi honen bitartez. Gainera, irailaren 28an, 18:00etan, aurrez aurreko tailerra egingo dute Kurtzio Kultur Etxean. Antolaketa-kontuak direla eta, horretan parte hartzeko izena eman beharko da aldez aurretik, 688 736 1346 telefono-zenbakira deituta.

"Tailerrean proiektuaren zehaztasun gehiago azalduko dira" adierazi du Udalak, "eta Sopelaren premiak eta etorkizun kulturala sakonago landu ahal izango dira".

Kultura Sopela
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun