Ugeraga Futbol Eskola online ekimena abiarazi dute

Ugeraga Kirol Elkarteak, FIT Learning Systems S.L. enpresagaz batera eta Sopelako Udalagaz lankidetzan, Ugeraga Futbol Eskola ekimena abiarazi du. Online eskola bat izango da, eta kirolaren balore positiboak landuko ditu doako prestakuntza-bideoen bidez: berdintasuna, indarkeriaren prebentzioa, lehen laguntzak, kirola eta desgaitasuna, elkartasuna, errespetua… 

Sopelako Udalak prentsa-ohar baten bidez azaldu duenez, FIT Learning Systems S.L. enpresa arduratuko da mugikorretik edo ordenagailutik ikusi ahal izango diren bideo bilduma bat sortzeaz eta zabaltzeaz, gero partiduetara joatean jasotako ezagutzak praktikan ipintzeko. Eduki horiez gozatu gura duten pertsonek posta elektronikoko helbide bat eman besterik ez dute egin behar, plataforma birtualean sartzeko.

Ikus-entzunezko eduki horiek Ugeraga Kirol Elkartea inguratzen duen masa sozial osoari zuzenduta daude: Zuzendaritza Batzordea, teknikarien kidegoa, jokalariak, gurasoak, bazkideak, eta, azken batean, sopeloztar gehienak.

Lehen hiruhileko honetan "Indarkeriaren prebentzioa kirolean" gaia landuko dute. Kirol-hezitzaileei zuzenduta dago bereziki, erta kirolean indarkeria prebenitzeko oinarriak, jarduteko jarraibideak eta tresnen gaineko informazioa jorratuko dute.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun