Agurtzane Meruelo

"Dentistok baditugu infekzioak saihesteko sistemak pandemia baino lehenagotik, beste birus batzuk ere badaude eta"

Denbora duenean abentura-kirolak egitea gustatzen zaio Meruelori, rallyak besteak beste.

Jaiotzez bilbotarra da Agurtzane Meruelo, baina 30 urte inguru daroatza Sopelan bizitzen eta lanean. 2018tik, Bizkaiko Haginlarien Elkargoko presidentea da.

Ikasketak amaitu eta gutxira ireki zuen Agurtzane Meruelok hortz-klinika Sopelan. 2000n Bizkaiko Elkargoan hasi zen, eta 2002tik 2018ra Batzorde Zientifikoko buru jardun zuen. "Urte hartan, ordura presidentea izandakoak ez jarraitzea erabaki zuen; talde batekin aurkeztu nintzen hauteskundeetara, eta aukeratu egin ninduten", azaldu du. Nork igarriko zuen COVID-19aren garaian karguan egotea egokituko zitzaionik? "Txantxetan esan ohi dugu, baina gu gara jendeari musukoa kentzeko eskatzen dieten bakarrak".

Maiatzean itzuli zen lanera, bere kide asko bezala. "Batzuek ekainera arte itxaron zuten badaezpada", argitu du, "baina gaur egun ia denok ditugu kontsultategiak zabalik. Izan ere, ez dugu behin ere guztiz itxita izan, konfinamenduan larrialdiak artatzeko prest egon behar genuen". Pandemian lan egiteko segurtasun-protokoloak garatu dituzte dentistek, baina halako kontuetan txukunak izatea berezkoa dutela dio Meruelok: "Birus honetaz gain beste batzuk ere badaude, eta betidanik izan ditugu infekzioen aurkako sistemak. Izan ere, dentistok herritar arruntak baino gutxiago kutsatu gara koronabirusaz".

Denbora librean abentura-kirolak egitea du gustuko, auto-rallyak besteak beste, argazkiak erakusten duenez. 2005ean hasi zen horretan, 40 urtegaz, eta 2013tik Maroc Challenge lasterketa solidarioan parte hartzen du, Marokon. "Bost eguneko orientazio-proba da, eta garrantzitsuena ez da azkarrena izatea, arau jakin batzuk betetzea baino", argitu du.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun