Erdialdeko Amerikan Eta eta Iota urakanek eragindako uholdeen kaltetuentzako laguntza batzeko asmoagaz, eta tokiko merkataritza suspertzen laguntzeko, gobernuz kanpoko erakundeak egiten duen lana erakusten duen argazki-erakusketa jarri du Sopelako Cien Pies zapata-dendan.
Erakusketa horretan, Guatemalan "Sexu eta ugalketa eskubideen alde" garatzen dituzten proiektuen argazkiak jarri dituzte, herrialde horretan egiten duten lanaren erakusgarri gisa. Horren bitartez, azaroan urakanek eragin zituzten uholde larrien kaltetuentzako dohaintzak batuko dituztela jakinarazi dute. Izan ere, Medicusmundi Bizkaiak askotariko proiektuak garatzen ditu bai Guatemalan, eta baita Hondurasen ere.
Erakusketa Cien Pies zapata-dendan egongo da ikusgai urtarrilean zehar; horrela, herriko merkataritza ere bultzatu gura dutela adierazi dute Medicusmundi Bizkaiakoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
