Pertsona nagusien artean estimulazio-kognitiboa eta fisikoa lantzeko gunea ipini dute Gernika plazan

Nagusientzako gune berria Gernika plazan kokatu dute. © SOPELAKO UDALA

Adineko pertsonen artean bizimodu-aktiboa eta osasungarria sustatzeko asmoz, zirkuitu berriak jarri ditu Sopelako Udalak. Horrez gainera, harremanak bultzatzeko guneak ere izango direla azaldu dute udal-ordezkariek.

Herritar nagusien zahartze-aktibo eta osasungarria sustatu gura du Sopelako Udalak, eta, hori gauzatzeko, gune berri bat jarri dute Gernika plazan. Zirkuitu horregaz bi helburu bete gura ditu Udalak: alde batetik, pertsona nagusiei hiri-espazio bat eskaintzea, ariketa fisikoa eta kognitiboa landu dezaten; eta, bestetik, pertsona nagusiek gizarte-harremanak sendotzeko gune bat izatea.

Sopelako Udalak 12.321 euro inbertitu ditu estimulazio-kognitibo eta fisikorako zirkuitu hori abiarazteko. Egitasmoak, pertsona nagusiei lagunduko die, memoria, kalkulua, hizkuntza eta arreta entrenatzeko. Bestalde, jarduera fisikoa egitea ahalbidetuko die, muskuluen narriadura prebenituz eta koordinazioa, oreka, mugikortasuna eta indarra sustatuz.

Zehazki, adimena sustatzera bideratutako elementuei dagokienez, bikoteak osatzeko panelak, hiruko artzain-jokoa, zifra eta letra jolasak; tenkagailua, egutegia eta labirintoak jarri dituzte. Bestalde, ariketa fisikoakaz lotutako panelei dagokienez, besoak lantzeko gurpil bat, pedal bi eta hatzentzako eskaileratxo bat jarri dituzte.

Gorputza eta burua lantzeaz gain, zentro horrek harremanak lantzeko helburua ere badauka, bakardadea delako adineko pertsonek duten beste arazo handietako bat. Hori dela eta, zirkuitua ingurune natural batean kokatu du Udalak, xede bera duten pertsonak bertaratzeko, eta bakardadeari aurre eginez zahartze aktibo eta osasungarri sustatzeko helburuagaz.

Horretarako, “instalazioak Gernika plazako jolas-eremuko haur-parkearen ondoan jarri dira, erabiltzaileek txikienakaz, ariketa kognitiboak egiteko aukera izan dezaten, belaunaldien arteko hesiak gaindituz”, azaldu du Josu Landaluze alkateak. Izan ere, udal-iturriek jakinarazi dute txikiakaz denbora pasatzea onuragarria dela adineko pertsonentzat.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun