Gazte ekintzaileak tokiko merkataritzara erakartzeko Googaz 3.0 ekimenera batu da Sopela

© GOOGAZ

Herriko merkatariak eta gazte ekintzaileak elkarlanean jarriko dituen Googaz 3.0 ekimena abiatuko dute hilaren 13an. Horregaz, 18 eta 30 urte bitarteko bi edo hiru pertsonez osatutako taldeek herriko merkatarien egoera aztertu eta konponbide berriztatzaileak proposatu beharko dituzte.

Hirugarren urtez jarraian, Googaz 3.0 ekimenean parte hartuko du Sopelak. Millenial inkonformista talde antolatzaileak adierazi du ekimen horrek onura asko dituela parte hartzaileentzako, udalerrientzako eta baita komertzioentzako ere. Azpimarratu dute gazteak beraien herriko komertzioen egoerara hurbilduko dituela ekimenak, eta merkatariei parte hartzaileek sortzen dituzten konponbideak helaraziko zaizkiela.

“Pertsona orok talentua dugula uste dugu, bakoitzak berea. Horregatik gara gure etorkizunaren sortzaile. Askotan, talentu horiek itzalpean gelditzen dira, eta horregatik gaude gu hemen. Googaz 3.0n gazteen abileziak bultzatuko ditugu, beraien bidea gidatu dezaten”, azaldu dute antolatzaileek.

Teresa Fernandez Enplegu eta Ekonomia Sustapeneko zinegotziak adierazi du tokiko merkataritza hurbiltzea helburu duen ekimen horretan parte hartzea ezinbestekotzat jotzen dutela.

Googaz 3.0 otsailaren 13an egingo dute, eta Sopelako frontoiko formakuntza gelan egongo da haren topalekua. Goizeko 10:00etan hasi eta 20:00etan bukatuko dute, beti ere, COVD-19aren aurkako neurriak betez.

Lehen fase horretan, parte hartzaileek Scape the Herria izeneko proba egingo dute Sopelako kaleetan tokiko komertzioen egoera ezagutzeko eta konponbide berriztatzaileak proposatzeko. Hurrengo faseetan probintzia mailako lehiaketa egingo dute, eta horietatik irabazle ateratzen direnek Europara bidaiatzeko aukera izango dute.

Izen-ematea eta fase guztien inguruko informazioa eskuragarri dago Googaz 3.0 ekimenaren webgunean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun