Sopelako Udaltzaingoak 27 salaketa jarri ditu asteburuan osasun-arauak ez betetzeagatik

Udaltzaingoak guztira 690 salaketa jarri ditu COVID19aren neurriak ez betetzeagatik. © SOPELAKO UDALA

Baimendu gabeko joan-etorriak edo maskararen erabilera desegokia antzemateko ohiko prebentzio-kontrolez gain, asteburu honetan, Sopelako Udaltzaingoak beste prebentzio-jarduera batzuk egin ditu, eguraldi ona dela eta, askoz bisita gehiago izan baitira udalerriko hareatzetan.

Udal-iturriek adierazi dutenez, Udaltzainek hondartzatik oinez egiten diren joan-etorrietan maskara erabiltzea derrigorrezkoa dela gogorarazi behar izan dute megafonia bidez, batez ere, itsasgorak bere punturik gorenera heldu denean.

Araudia betetzeari dagokionez, 27 salaketa tramitatu dira COVID-19agaz zerikusia duten arau-hausteengatik. Alde batetik, hamabi nazionalitatetako Erasmuseko 23 unibertsitate-ikasle salatu dituzte zapatuan, Arriatera hondartzan distantzia gorde gabe kontzentratzeagatik eta alkohola edateagatik.

Bestalde, ostalaritzako lau lokal salatu dituzte. Horietako batean hamasei pertsona zeuden mahai jarraitu berean, gehienak maskararik gabe. Besteetan, aldiz ez da itxiera ordutegia errespetatu eta araudiak baimendutakoa baino pertsona gehiago detektatu dituzte mahai baten inguruan.

Gaur egun arte, Sopelako Udaltzaingoak guztira 690 salaketa jarri ditu osasun-arauak hausteagatik.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun