Sopelako Udalak udalerrian oinezkoen mugikortasuna eta segurtasuna areagotzeko proiektua iragarri du. Hori gauzatzeko, herritik pasatzen diren 2.500 ibilgailuen trafikoa erdigunetik atera eta pertsonentzako 16.000 metro koadroko gunea sortzeko asmoa adierazi du.
Esku-hartze horregaz, San Pedro eliza eta Jauregizar parkearen guneak bateratuko dituztela azaldu dute, bertan, oinezkoentzako izango den gune bat sortzeko asmoz. Horren ondorioz, erdiguneko aparkalekuak kenduko lituzkete, eta trafikoa ere berrantolatu beharko litzateke. Horretaz gain, Eleizalde eta Landa Doktorearen kaleetan urtarrilean hasitako prozesuagaz jarraitzeko asmoa ere berretsi dute; hala, ibilgailuak garajeetara edo zamalanetarako bakarrik igaro ahalko dira bertatik.
Aparkalekuari dagokionez, elizaren inguruan doako parkinga egitea aurreikusi du Udalak; hori Bidebietan proiektatuta dagoen aparkatzeko gunearen osagarria izango litzateke. Gainera, 170 aparkaleku-plaza izango lituzkeen lur-azpiko gunea egiteko aukera ere ari dira aztertzen.
Herritarren iritzia
Hurrengo pausoak eman aurretik, Udalak herritarren usteak ezagutu gura ditu, eta, horretarako, herritarrentzako zabalik egongo den bilkura egingo dute apirilaren 15ean, 18:00etan, Kurtzion. Horretaz gain, 16an eta 17an informazio-gune bat jarriko dute Jauregizar plazan, informatzeko eta herritarren iritziak batzeko.
Udal-iturriek adierazi dute herritarrei ahotsa eman gura dietela, eta lehen eskutik jakin zeintzuk diren beraien usteak, horren araberako proiektua egin ahal izateko.