Joan den maiatzaren 16an, Larrabasterrako hainbat auzokide bildu zen Abaro sektoreko planifikazioak sortu dituen "arazoak" direla eta. Diotenez, bertako planifikazioa "txarra" da, eta hainbat eragin izan ditu auzoan, hala nola lehenagotik zegoen zirkulazio-kaosa eta bide-segurtasun eza areagotu.
Bilera horretan, erabaki zuten batzar bat eskatzea Sopelako Udaleko udal-talde bakoitzagaz; gobernu-taldeagaz eta oposizio-taldeakaz; jakiteko zein den haietako bakoitzaren jarrera uztaileko osoko bilkurako bozketan urbanizazio-proposamen horri buruz: alde edo kontra; alegazioak dituzten eta zein diren.
Era berean, auzokideek jakinarazi dute herritarren alegazioak aurkezteko sinadura-bilketa abiatu dutela. Joan den aste-akabuan –ekainak 5-6– hasi ziren, eta hurrengoan –ekainak 12 eta 13– ibiliko dira ere zeregin horretan Urgitxieta plazan, 12:00etatik 14:00etara. Horrez gainera, azaldu dute udalerritik kalerik kale ibiliko direla ere.
Segurtasunik ez, auzokideen arabera
Auzokide-taldeak gogoratu duenez, 2017an, Sopelako Udalak azterlan bat egin zuen Gatzarriñe eta Iberre kaleen arteko bidegurutzean. Horren emaitza izan zen inguruok ez zirela seguruak: "Ordu bakoitzeko 800 ibilgailu igarotzen dira, eta 800-900 artean bide-segurtasun eza da". Azpimarratu dutenez, garai horretan, ospitalea ireki berria zuten, eta ez zen % 100ean funtzionatzen ari. Hala egiten duenean, egunean 4.200 ibilgailu baino gehiago ibiliko direla iragarri du auzokide-taldeak, "orain Olabide kalea aukeratu dutenean baino ibilgailu gehiago (Udalaren gobernuak hasieratik nahi izan zuen bezala), ospitalerako, industrialderako, Mecanerrerako, Mungiarako, Plentziarako eta Berangoko merkataritza-zentrorako sarbidea izateko. Zirkulazioa asko biderkatuko zaigu".